Ausflug Weihnachtsmarkt Einsiedeln vom 05. Dezember 2025 – Rückblick

Wiehnachtsmärt isch immer än Ränner im Programm vom Frauäverein.

Scho glii sind viel Aamäldigä zämä gsii, so händ mir mit äm doppelstöckigä Car chönnä reisä.

Äs munter’s Schärli Frauä hett sich scho bim Iistigä gfreut, isch doch dä Uusflug viel günstiger wordä, als uf dä Uusschribig aakündät.

Guät in Eisiedlä aachoo, sind denn diä Frauä grüppliwis, zielstrebig losmarschiert. Einigi händ sich bim Bewunderä vo dä Kathedralä troffä, am Märt isch eim öppä äs bekannts Gsicht begägnät und äs isch ä wunderschöni Stimmig gsii. Au wo’s mal churz us äm Hochnäbel gfiserlät hätt, äs hätt nid grägnät gäll Karin, hätt niemert über s’Wätter gchlagt.

Superpünktlich sind d’Frauä de bim Car iitroffä.

Uf dä Heireis isch viel verzellt und uustuschät wordä, alli händ vo schönä Erläbnis brichtet und sind rundumä zfriedä und glücklich gsi.

Üsä super Chauffeur Roman Nüssli hett üüs wunderbar wieder uf Näftäbach zruggbracht. Sini umsichtigi, ruhigi Fahrwiis isch än Gnuss gsi und er isch immer diä absoluti Ruäh gsii!

Dankä vielmalä all denä wo debii gsii sind und dezue biitreit händ, das dä Uusflug äso äs schöns Erläbnis wordä isch